منتــــــــــــــــــدى الســـــــــــــــــريحة
الاخوة الاعضاء الوزوار
منتديات السريحة ترحب بكم وتتمنى لكم قضاء اسعد الاوقات من خلال منتداها العامر

منتــــــــــــــــــدى الســـــــــــــــــريحة

منتدى السريحة لجميع اهل السريحة ومن يحبها
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

نرجو من الاخوة الاعضاء التوجه للموقع الجديد للمنتدى www.alseriha.com

المواضيع الأخيرة
» حنين شدني اليك
الإثنين فبراير 23 2015, 14:08 من طرف هاوى القمر

» دعوة لإزالة الأسماء المستعارة
الإثنين ديسمبر 29 2014, 05:52 من طرف محمد العبد حبيب الله محمد

» اهلا بيكم
الجمعة ديسمبر 13 2013, 17:49 من طرف jooazrag

» اشهر الدبلومات العالميه التى تؤهللك للعمل بوظائف مميزه
الإثنين سبتمبر 30 2013, 15:57 من طرف iecs-ra

» مفاجاه لكل من يرغب العمل فى مجال التسويق
الإثنين سبتمبر 30 2013, 15:32 من طرف iecs-ra

» فرصه لتعلم اشهر النظم العالميه فى عالم السياحه و الطيران
الإثنين سبتمبر 30 2013, 15:19 من طرف iecs-ra

» اجمل دمعة في حياة الانسان
الإثنين أكتوبر 04 2010, 10:33 من طرف فكري عصام

» تحية وسلام وشكر وعرفان بالجميل
الإثنين أبريل 05 2010, 10:03 من طرف ابو تسنيم

» بـــــــــــــ ورجعنا لعيونكم ـــــــــــــــــــاك
الخميس ديسمبر 03 2009, 05:39 من طرف طبي

» الأخ العزيز / هـشام مبارك ...
الخميس نوفمبر 05 2009, 08:26 من طرف زائر

» الأح العزيز / محمد بساطي ...
الثلاثاء نوفمبر 03 2009, 08:18 من طرف زائر

» إلى المدير و المراقب العام ...
الجمعة أكتوبر 30 2009, 17:06 من طرف زائر

» لماذا كل هـذا التجاهـل ؟؟؟
الأحد سبتمبر 27 2009, 09:27 من طرف زائر

» رجاء ... رجاء خاص ...
السبت سبتمبر 26 2009, 20:07 من طرف زائر

» رسالة إلى : الإدارة ...
الخميس يوليو 23 2009, 11:04 من طرف زائر

» رسالة للأخ الشيخ / هـشام مبارك ...
الخميس يوليو 23 2009, 11:00 من طرف زائر

» تأملات في المنتدى الجديد ...
الإثنين يوليو 20 2009, 10:07 من طرف زائر

» هيا بنا يا ال السريحة
الثلاثاء يوليو 07 2009, 20:09 من طرف البشير ودالنعيم

» النيل أبو قـرون ... في ميزان الجرح و التعديل .
الجمعة يوليو 03 2009, 19:15 من طرف البشير ودالنعيم

» من نحن ومن هم
الخميس يوليو 02 2009, 07:53 من طرف البشير ودالنعيم

أفضل 10 أعضاء في هذا المنتدى
ناندا
 
Admin
 
abu Jasim
 
هشام السريحه
 
هشام مبارك عبد الرحمن
 
الهدهد
 
حاتم سقراط
 
ودعجيب
 
ريال مدريد
 
ابو سلطان يقول سلام
 

شاطر | 
 

 العريس نـــــــــط

اذهب الى الأسفل 
كاتب الموضوعرسالة
ابو سلطان يقول سلام
مميز جدا
مميز جدا
avatar

ذكر عدد الرسائل : 787
العمر : 30
المدير العام : 0
تاريخ التسجيل : 05/10/2008

مُساهمةموضوع: العريس نـــــــــط   الإثنين مارس 30 2009, 14:41


من صحيت الصباح فتحت عين والتانيه لسه وكوركت<هبه..هبببببببببببه>جات اختي الصغيره جاريه اها ..في شنو اصبحنا واصبح الملك لله...اها عريس فافه جا....ردت لسه...كيف لسه ...هي اجيب ليك يعني..قالو منتظرين يمكن يجي الليله
الموضوع ياجماعه الخير بت جيرانا فاطمه..ومن قمنا صغار بنقول ليها فافه...يمكن هي عشان مضاف ومضاف اليه حزفو الطاء وختو محلها الفاء تاني..اها من منا صغار وفافه دي كبيره ..فافه ياناس المنتدي ..مافي عروسه في الحله ماجاملتها اي عروسه فافه بتكون حننتها ياساقتها الكوفير..المهم فافه قاعده عرسو بنات دفعتها كلهن ..سميحه وهيام واماني بخيته ...وسميحه جابت ليها كوم عيال والكبير لحق الثانوي وفافه لسسسسسسسسسه...وتدور الايام وتظهر شبكه موبيتل وفافه لسه تظهر اريبا وفافه لسسسسسسه ويحولوها ام تي ان وفافه لسه وتجي شبكه سوداني وفافه لسه وفافه لسسسسسه ماعرسوها..والايام تمر وفافه بقت زي التيم المغلوب 2/0وباقي 3 دقايق وتنتهي المباراه مؤمله تجيب قون في ال3دقايق ولوماجا الزمن الضايع في ....يوم صحت فافه من النوم...ومسكت تطبز في تلفونها ال3100القديم وخشت غلط علي نمره ..ودار الحوار التالي...فافه...هي معليش جاك رصيد بي الفين بالغلط ممكن ترجعو..؟ويرد علي الطرف الاخر...شنو رصييييد ..متين دا ماشفتو..فافه ....والله انامشيت احولو بس لخبط بين التسعه والسبعه اصلو يشبهن بعض بس التسعه مغلوبه مازي السبعه...فرد عليها ...هييييي التسعه ماغلوبه تقصدي التمنيه ...وجاتو في راسو فكره <البت دي ماناقشه حاجه..شكلها ماقرت محو الاميه..هسه اكل ليك راسها الخفيف دا>.....هيييي انت معاي ..صاحبنا اتخلع ....آآآآآآآي ..قلتي لي انتي اسمك منو...ردت..انت تودي اسمي وين بترجع الالفين ..واللا ااكلم ليك اخوي الكبير .....لالالا اي حاجه الا اخوك انا برجع ليك الالفين وبزيدك الفين فوقها خلاص...لم تجد فافه شيئا سوي الضحكه وقالت هييييييي والله انت ظريف خلاص ..اخوي شنو انا زاتي ماعندي اخو ولا معرسه كمان ..هيييييي يالخفيفه هسه السألك من عرس منو؟ قلت شنو..قاليها قلت ليك انتي من وين ..انامن دنقلا..وانت من وين ..انامن سنار ...وشغال مع ناس سلفاكير في القصر الجمهوري ..تعرفيهو...ردت فافه ايوا بعرفو شفتو في الكلمات المتقاطعه مش الخاتي طاقيه سودا دا..بس هو زااااااااتو.....قلت لي اسمك منو...اسمي كمال بقولو ليي اللورد ...اها انتي منو؟انااسمي فطومه بدلعوني يقولو لي فافه السمحه...اها يافافه ..دا رقمك....ايوا مع السلامه ....هيييييي ياللورد نسيت اقوليك....اها ..الرصيد خليهو ..عربون صداقه بيناتنا..ومع نهايه المكالمه ..ابتسمت فافه..ورف قلبها<اصلو قلبها خفيف جنس خفه>
ونواااااااااااصل بعد شويه...





عدل سابقا من قبل ابو سلطان يقول سلام في الإثنين مارس 30 2009, 14:45 عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابو سلطان يقول سلام
مميز جدا
مميز جدا
avatar

ذكر عدد الرسائل : 787
العمر : 30
المدير العام : 0
تاريخ التسجيل : 05/10/2008

مُساهمةموضوع: رد: العريس نـــــــــط   الإثنين مارس 30 2009, 14:42


وقفنا ياجماعه...فافه بدت تحلم
وخطت المخده فوق راسها وبدت تحلم ....الووو الووو ...ايوا ..ايوا ياللورد قلت اشوف اخبارك شنو....شفت سلفاكير في التلفزيون اتزكرتك.....(تاني ياشكر الله الا اكان تجيبو محل صوره سلفاكير ورده)..والله انا زاتي من سمعت صوتك وهو برن في اضاني...عارفه يافافه صوتك ..هادي وحنوووووون وكانو زغزغه العصافير....لم تتمالك فافه نفسها وقعدت في الواطه...انبرشت عدييييييييل ....اها....اهي ..اها..جد ياللورد...والله جد وانا بتكلم معاك وكأني بتكلم مع ..فاتن حمامه زمن الاسودوابيض.....في هذه اللحظات كانت فافه تعيش في عالم تاني..فااااااااااااااافه ...اتخلعت ..ااااااااااه معليش سرحت ياللورد ...قلت ليك عندك شريحه اريبا...فافه....ايوا....خلاص بعد 12بضرب ليك......
...وفافه منتظره الساعه 12 من المغرب وماقدرت تحضر المسلسل نور في تلك الليله ...وبقت سرحانه متخيله اللورد زي مهند السمح دا....وتحدثت في ..الليله ديك...واستمر الكلام بينهما شهور......فافه ...اتغيرت شدييييييد وبقت اخر قشره ..واخر كريمات ...والله تجي بي ورا بيتهم...تلقي ستين نوع من علب الكريمات مجدوع...اها يا ناس اللورد ...قال لي فافه داير ..اشوفك....اشوف صورتك...وفافه اتملت كريمات وكحل وريحه...مشت لي صحبتها سحر .صورتها من تلفونها الn70ورسلت الصوره بالوسائط.......واللورد اتخلع باصوره.....وبدا ...يرسم احلامه......المهم الحله كلها سمعت بقصه ليلي وقيس الجديده...والشمار طق....فافه داير يعرسوها....واحد شغال مع ناس سلفاكير ....امي سألتيني...فافه دايرين يعرسوها واحد شغال مع سفلافير...سلفااااكييير ياامي..انطقيها صح...هي .ياوليد ولدي فافه كيف ترضي بالكافر ...هوووي ياامي دا كلام شنو...دايره تعرس واحد اسمو كمااال...ماجنوبي شغال مع سلفاكير ساي يمه...ردت علي ..لو كده خلاص ...
المهم اللورد قالو جاي الشماليه دنقلا .سلفاكير جايي يفتتح الدوره المدرسيه في دنقلا....وبدأت الشمارات ...وامي جات قعدت جنب التلفزيون ...نشره الاخبار يقرأها عمر الجزلي (السلام عليكم ورحمه الله تعالي وبركاته ..يقوم السيد سلفاكير ميارديت بزياره لحاضره الولايه الشماليه دنقلا..لزواج اللورد كمال بفافه ..وفي نفس الاطار يفتتح الوره المدرسيه رقم 20بدنقلا...والان الي النشره الاقتصاديه....الخ)...وبدأت الولايه الشماليه لاستقبال اهم حدثين ..عرس فافه ...والدوره المدرسيه...وقام والي الولايه بتفقد الميادين والمسارح ...وعمليه قطيع البصل..المهم اللورد وصل ...مع السيد سيلفا...واثناء الاحتفال زاغ ولاقي فافه في كافتريا حلويات محاسن و..واتفقو علي كل شئ ..واكل معاها شويه باسطه..ورجعت فافه..لتستعد لدخول القفص الزهبي البقولو دا...وحدد يوم الخميس....العرس والعريس رجع مشي يجيب اهلو....وفافه خلاص ..قعدت ..في (..........) وبقت مابتشوفها الا لابسه العبايه السودا والقفازات في يدينا ..ليه ماعارفين..ياربي بقت انصار سنه؟؟؟....وجاء اليوم المعلوم ..الخميس...والكل في قمه الاستعداد ..ابوي قبيييييل لبس العمه وجدع العمه وطلع علي البيت المهيأ لي الضيوف...وطبعا انا منتظر ناس سنار صناع التاريخ احفاد عماره دنقس وعبدالله جماع اهل سلطنه الفونج...ودخلت استحميت وقشرت بي بنطلوني البني الاشتريتو السنه الفاتت يوم التخريج ولبست معاهو قميصي المشخط بني بي ازرق..وطلعت علي بيت العرس...ويالسلام البلد الليله لابسه الفرح ....لاقيت في الشارع عاصم وصلاح اسامه....وين يادكتور ...ارح معانا....وين ..امشي معاكم...انحنا ماشين نتصلح ونجي .. واتزكرت عمر الدوش لماقال في رائعته سعاد(ومرقت علي طرف البلد وودرت جد)...الجماعه دايرني اطلع معاهم واجي ودران زيهم..المهم اناواقف جات ماره لوزه ..وآآآآآآآآه من لوزه ..وابتسمت لطفلتها الصغيره..حلاتها وحلاه شافعتها واتزكرت ايام الشهاده السودانيهوابتسمت لوزه لابتسامتي لطفلتها..وآآآآآآآه جات في راسي فكره امشي ..اودر مع الجماعه...بس الحمدلله لقيتهم فاتو..
ونواااصل بعد شويه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابو سلطان يقول سلام
مميز جدا
مميز جدا
avatar

ذكر عدد الرسائل : 787
العمر : 30
المدير العام : 0
تاريخ التسجيل : 05/10/2008

مُساهمةموضوع: رد: العريس نـــــــــط   الإثنين مارس 30 2009, 14:48

دخلت...بيت العرس الدنيا جايطه....واصوات مختلطه.....جيبي صحن الملوخيه دا ياامونه ...يارانيا سوطي حله الفاصوليا.....بري قالو موسي الزومه مالاعب في مباراه الدوره السد.....قالو اوكامبو دا يسوط قراراتو ويشرب مويتها...وجوطه شفع ..وفافه ودوها بيت ناس رقيه لي اشراقه الحنانه.....
اها ياناس الضيوف وصلو وين؟؟؟؟؟........السؤال دا تردد كتيييييير ومافي زول بجاوب بس الناس كلها تسأل........يااخوانا شوفو....اهل العريس وصلوا وين....البعرف اهل العريس منو؟؟ مافي زول جاوب(اصلو دا سؤال من بره المقرر)المهم اخوي الكبير انتبه ومشي لفافه بيت ناس اشراقه الحنانه...وشال منها الرقم......واتصل علي العريس.......عفوا هذا المشترك لايمكن الوصول اليه حاليا...الله كيف لايمكن الوصول اليه؟؟؟الضيوف وصلو...شيخ الامين المأزون جا شايل دفتروا الاخضر..
وبعد شويتين تلفون اخوي رن....اندهش اخوي وعاين لي وقال (العريس مسكل لي) يمسكل ليك كيف؟ وفي عريس بيمسكل ودا داير يعرس كيف؟؟المهم قلنا مابيناتنا انحنا حنبقي نسايب واتصلنا عليهو .اخوي؛وين انتو ياكمال....اللورد؛..والله معليش ياناس
انامابقدر اجي.......شنو؟؟؟؟؟؟؟؟...مابتقد ر تجي....كيفن يعني؟؟؟...والله ياجماعه انا بتكم دي قلت دايرها لكن في ناس بتصلو علي من حلتكم دي ..وقالو لي لوعرستها انحنا بنطعنك.....شنو ؟؟؟؟؟...بنطعنك بسكين..الكلام دا كيف والرقم بظهر ليك..كم..رد اللورد والله مابظهر لي رقم؟؟؟...انتهت المكالمه...هسه ياوليد الضيوف ديل يقولو ليهم شنو ...نادينا اخو العروسه وريناهو الحاصل.....طيب هسه الضيوف ديل والامين المأزون..وعاصم وشلتو المشو يودرو ديك يوروهم الحاصل كيف؟؟؟
المهم اتفقنا مع العريس انو يجي بكره الجمعه....يوم الجمعه الصباح بنتصل علي العريس تلفونو مقفول ....لحدي بعد الصلاه....العريس تاني مسكل.....واتصلنا وين يازول....والله ياجماعه اناامي ماتت الليله عشان كده ماجيتكم....(هوووي ماتت كيف وماتت ليه)استغفر الله العظيم.......
وانتشر الخبر ....العريس امو ماتت..العريس هددو بالطعن بالسكين(لسه منتظرين جماعه مسلحه تتبني عمليه تهديد اللورد العريس...ومافي جماعه اعلنت تبنيها العمليه ...حزب الله والزرقاوي والقساموصالون الريال زالواثق وابوجاسم وادمن وجميع المجموعات لم تعلن تبنيها للعمليه؟؟)
المهم العريس قفل التلفون وبطل مسكولات ...وفافه جاتها حاله نفسيه ...وكتبنا شكوي حنرفعها لمؤسسه الرئاسه نشتكي سلفاكير زاتو.......وحرااااااام عليك ياللورد حرقت فافه بي القعاد فوق النار....وياناس اعملو حسابكم تاني العريس ماينط
القصة من عزيزي ورفيقي معاذ اللدنقلاوي له التحية



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Admin

avatar

ذكر عدد الرسائل : 1693
العمر : 46
المدير العام : 0
تاريخ التسجيل : 01/04/2008

مُساهمةموضوع: رد: العريس نـــــــــط   الثلاثاء مارس 31 2009, 06:21

جميلة يا ابوسلطان وتحياتي لصديقك معاذ الدنقلاوي الذي حبك القصة باسلوب كوميدي سلس ورائع جدا

_________________


أبوك بســـــــــاطي القبيل *** تبراه الشعبة والجنزير
متحكر فوق كرسيه العديل ***كورك قال يا غفير
العاداك وين يطـــــــــــير *** شقيا صادف نكير
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alseriha.akbarmontada.com
فقدابى1
مميز


عدد الرسائل : 158
المدير العام : 0
تاريخ التسجيل : 02/07/2008

مُساهمةموضوع: رد: العريس نـــــــــط   الأربعاء أبريل 01 2009, 00:34

ابو سلطان
الله يديك العافيه
تحياتى للاخ معاذ .الشى الدناقله ديل ما فيهم واحد جعلى يحل الورطه دى

فقدابى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
هشام مبارك عبد الرحمن
مشرف المنتدى الإسلامي
مشرف المنتدى الإسلامي
avatar

عدد الرسائل : 1322
المدير العام : 0
تاريخ التسجيل : 08/04/2008

مُساهمةموضوع: رد: العريس نـــــــــط   الأربعاء أبريل 01 2009, 08:10

فقدابى1 كتب:
ابو سلطان
الله يديك العافيه
تحياتى للاخ معاذ .الشى الدناقله ديل ما فيهم واحد جعلى يحل الورطه دى

فقدابى

هاها هاها ، تعليقك في محلو يا ود عمتي ! بس نحن رفاعة ياخي مالك ناسينا !

_________________
يا غاديا في غفلة ورائحا الي متي تستحسن القبائحا
وكم إلي كم لا تخاف موقفا يستنطق الله به الجوارحا
يا عجبا منك و كنت مبصرا كيف تجنبت الطريق الواضحا
كيف تكون حين تقرأ في غد صحيفة قد ملئت فضائحا
أم كيف ترضي أن تكون خاسرا يوم يفوز من يكون رابحا


عدل سابقا من قبل هشام مبارك عبد الرحمن في السبت أبريل 04 2009, 10:07 عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابو سلطان يقول سلام
مميز جدا
مميز جدا
avatar

ذكر عدد الرسائل : 787
العمر : 30
المدير العام : 0
تاريخ التسجيل : 05/10/2008

مُساهمةموضوع: رد: العريس نـــــــــط   الأربعاء أبريل 01 2009, 19:41

عزيزي الادمن التحية لك
عزيزي فقدابي لوكان فيهم جعلي كانت تكون حاجة تانية
ابوعبدالرحمن شكرا على المرور
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
العريس نـــــــــط
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتــــــــــــــــــدى الســـــــــــــــــريحة :: {{القســـم الثقـــافي}} :: منتدى الشعر-
انتقل الى: